Siccone Polenton

Vite scriptorum illustrium latine lingue

Edizione di riferimento:

Zeitschrift für romanische Philologie, 1903 (Bd. 27), p. 298 e sgg.

I. viij.

(Cd. Museo Civ. di Padova CRM 247, c. 56a).

Hoc ferme in genere colligende historie que ad miseriam pertineret, Johannes Buccatius etiam versatus est: dicendi namque studio delectatus iste prodesse omni diligentia posteris vigilavit. Orosio inferior annos ad viiijc fuit, quippe vixit cum Petrarca Buccatius: illo tamen senescente, hic studio ac etate florebat. (Imperabat Boemorum rex Carolus, nominis eius quartus Caesar: Sigismundi pater hic fuit, eius ipsius quem nuper papa Eugenius coronavit.) Buccatium ante omnia historia oblectavit: scribens autem collegit ex novis et antiquis historiys illustrium virorum infelices casus, eosdemque libris novem accurate ac breviter memoravit. Mulieres item claras que omnibus superioribus seculis digne usque nominatione fuissent, libro uno amplexus est. Librum quoque de foeminis impudicis fecit. Deorum item genealogiam, ingens quidem ac utile studiosis ad poetas interpretandos opus, quindecim libris absolvit. Scripsit etiam de montibus de silvis de fontibus de lacubus de fluminibus de paludibus de maribus famosis libris septem. Hec latine ac perite. Sermone autem patrio atque suavi complura volumina edidit fabulis pulcherrimis ac multis plena. Decades preterea tres T. Liviy patrium in sermonem vertit. Patria vero sibi que florum Tuscie flos est, Florentia fuit; sed plurimum Neapoli regia in aula obversatus est.

© 2004

Indice Biblioteca

Biblioteca>

Progetto Boccaccio

Progetto Boccaccio

© 1996 Tutti i diritti sono riservati © aprile 1998 -

Biblioteca dei Classici Italiani

Ultimo aggiornamento: 31 agosto, 2011