BONVESIN DA RIVA

Rationes quare Virgo tenetur diligere peccatores (M)

Ragioni per cui si ritiene che la Vergine ami i peccatori

Edizione di riferimento

Poeti del Duecento, 2 voll., a cura di Gianfranco Contini, Riccardo Ricciardi editore, Milano Napoli 1960

1    La vergen glorïosa    matre del Salvator

verasment è tenudha    d'aiar li peccaor,

e k'ella'n dé curar    e amà'i con savor

per molt raxon zo monstro    a lox del Creator.                        4

 

2           Inprimament la Vergene    per lor ha grand honor

perzò k'ella è per lor    matre de De segnor:

plu è possant per lor    appress lo Creator

ka vergen ni ka martiro    ni oltro confessor.                            8

 

3            Ella è aprov l'Altissimo    plu grand e plu exaltadha

ke sia in ce ni in terra,    e fi plu honoradha:

Regina 'd paraiso    perzò fi 'la anomadha

perzò k'ella è dr'Altissimo    matre glorificadha.                    12

 

4            Iesù Crist venn îl mondo    a sostenir tormento

per tò i peccai del mondo    per nostro salvamento,

dond per li peccaor    fo fag quel ovramento

k'el fo fiol dra Vergene    senza dexdeniamento.                    16

 

5            Adonca le regina    ben è per lor tenudha,

da po k'ella è per lor    in tal honor metudha:

donca no sia persona    ke tant sia malastrudha

ke no's but entre brace    dra Vergen benestrudha.              20

 

6            Per una oltra rason    anchora voi monstrar

ke i peccaor del mondo    ella è tenua d'aiar,

zo dig de quii ke's volen    entre soe braz butar,

ke's volen fedhelmente    a le recomandar.                             24

 

7            Regina 'd misricordia    ella fi appelladha,

in far misericordia    adnca dé 'la ess dadha,

donca ki's vol pentir,    no è persona nadha

a ki ella vedha aïdha    s'ella 'g fi demandadha.                    28

 

8            Anchora le regina    sì ha molt grand rason

d'aiar nu peccaor    con grand compassïon:

ella è nostra parente    per generatïon,

ella è 'la nostra carne    in l'eternal mason.                            32

 

9            La Vergen glorïosa,    e'l so fio oltresì,

la nostra carne e'l sangue     sì ha portao da qui:

nostra parent è donca,    ni altrament pò dì,

ni se'n porrav lavar    on quant porrav pur fì.         36

 

10          Adonca 'l parentadhego    k'è entre nu e le

no dé zovar grandmente    in quella cort de ce,

adonca ella è tenudha     aprov l'altismo De

d'aiar zascun del mondo    ke's vol tornar a le.                      40

 

11          Con grand fedhusia donca,    ki vol ess sì sia,

zascun se but îl brace    dra Vergene Maria

sperand pur senza dobio    k'ella 'g darà aïdha,

K'ella 'l trarà a lux    s'el foss in tenebria.                                44

 

12          Li bon in bona via    grandment ella sosten,

ai rei, se i la demandano,    ella'g farà grand ben,

ai desperai medhesmi,    e pur morir se cren,

da malamort li scampa,    sì k'i faran po ben.                        48

 

13          Ella ha za aiao da morte    mult homni desperai,

li quai in corp e in anima    seraven dexbregai:

de zo ve cuit miracui    'en ben  da fì cuitai

a lox de quella Vergene    e a ben dri stravïai.                        52

 

14          Un pover hom de fora    un so fïol haveva,

lo qual el mis a scola    fazand zo k'el poeva;

el l'à fag geregar,    cantar el imprendeva,

e imprendand adesso    lo fantinet cresceva.                         56

 

15          Lo fantinet so caro    sì steva a la cità.

Deven un grand giavaldo    îl temp dra soa età,

a temp el fo fag prevedhe,    per söa voluntà,

tut zo k'el no foss degno    de tanta dignità.                           60

 

16          El ha alogao lo dì    k'el dé far messa nova.

No manda al patre so    k'el voia far quest'ovra:

perzò ke so patre era    un pover hom de fora,

no'g plax ke'l patre sia    ni sapia 'd questa nova.                 64

 

17          Al patre dal so fio    nïent ghe fo mandao,

ma k'el sop dai oltri homini    lo dì k'era ordenao;

soi pui e zo k'el vosse    el ha apparegiao

e ven là o' è 'l so fio    inanz lo dì alogao.                                  68

 

18          Quand lo preve novello    lo so patre hav vezudho,

el fo gram ke so patre    illoga era venudho;

el amoniss illoga    lo patre benestrudho

ke'l mang,  po torne a casa,    k'el no fia cognoscudho.         72

 

19          El fa tornar a casa    lo patre incontinente;

no vol k'el stia a la messa    k'el dé fà 'l dì seguente

dexdenia 'l patre so,    lo repta per nïente,

se ten in grand dexnor    s'el stess illò presente.                    76

 

20          Se ten in grand vergonza    se 'l patre steva illò,

pek k'el no foss sapiudho    k'el foss lo patre so,

perzò k'el no pariva    k'el foss grand hom da zo.

Lo patre torna a casa    quant gramament el pò.                   80

 

21          Tornao è 'l patre a casa    molt gram e tribulao,

pensand sover so fio    da ki el è dexdeniao,

lo qual con tanta brega    el haveva alevao;

pensand sover quest fagio,    el è tut desperao.                     84

 

22          El planz e sì suspira    e gramament se dore;

pensand sover so fio    tut turbao a lo core.

El è tant desperao    ke pur morir el vore,

giamand la rea cossa    da De e dai sanct se tore.                 88

 

23          Sovenza fiadha illora    giamava l'inimigo.

Quand fo venudho a hora    k'el av giamao ben digo,

el fo venudho illoga     lo Satanax antigo,

el ven a lu in forma    d'un olcellat inigo.                                 92

 

24          «Eo sont venudho a ti»    zo dis lo Satanax

«Tu m'he giamao quiloga.    Di' que tu voi, que't plax?»

Respond lo desperao    a l'olcellat malvax:

«Eo voi ke tu me appendi,    ke'l viver me desplax.»              96

 

25          Illora l'olcellat    respos al desperao:

«Met la correza in collo    se tu voi ess aiao,

e'n nom dra matre'd Criste    no fia pur anomadho;

se tu così voi far,    tost he ess desbregao.»                            100

 

26          A quest parol illora    lo desperao cativo

mis la correza in collo,    no vol el plu stà vivo;

illora l'olcellato,    quel Satanax antigo,

col gramp trazeva suso    lo desperao inigo.                          104

 

27          El lo traeva in airo    e tut l'angustïava,

la golla se'g strenzeva    e'l flao za ghe mancava;

el fo stremio da morte,    pentio a tuta fiadha,

giama sancta Maria,    quella Vergen beadha.                      108

 

28          La Vergene Maria,    quam tost el hav nomao,

lo Satanax illora se'n    part a mal so grao:

un grand squass dé in terra l   o miser mal guidhao,

e sì da mala morte    la Vergen l'à scampao.                         112

 

29          Lo peccaor illora    sì fo tut convertio,

a penitentia torna,    da mal fà è partio,

fag è devot dra Vergene    e so amator compio,

sapiand k'el è per le    scampao e guarentio.                         116

 

30          Da illò inanz el ama    la Vergen glorïosa,

per ki el è scampao    da mort angustïosa.

Donca lodhem tal dama    ke fo tant pïatosa,

ke trax quel desperao    da via malitïosa.                              120

 

31          Donca ki vol ess savio    e scampà da ruïna,

in tug li soi perigori    se torne a la regina:

quella è fedhel amiga,    ki il so amor degina,

de tug li peccaor quella     è speranza fina.                           124

Indice Biblioteca

Biblioteca

Progetto Bonvesin

© 1996 - Tutti i diritti sono riservati 2002-2010

Biblioteca dei Classici italiani di Giuseppe Bonghi

Ultimo aggiornamento: 11 luglio 2011